ابراهيم وخلف جننونا وفوزنا علي الجونة

صحيح الفرحة حلوة وجميلة والثلاث نقاط و لا حلاوة

 طعم العرقسوس الساقع  بعد إفطار محترم .. و حتي لو كان الفوز علي الفرق الواقعة ... اللي كان حازم والعمدة والرومي .. بيقزقزوا لب ويقشروا سوداني وهما بيلاعبوهم

الفوز جميل و طعمه لذيذ  و حتي لو بريمونتادا علي الجونة .. بعد ابراهيم عثمان و محمد خلف .. جننونا
 ليه بقي
الفوز علي الجونة كان بالروح و الكفاح و الرجولة
والحاجات دي كانت مع وجود سحنة ابراهيم وخلف = صفر
 كنت تحس ان لاعبي الاسماعيلي  ضاربين اسبيراكس و عندهم اكتئاب و عقلهم فيه غباء اردوجان و رجليهم مليانة  شوال رمل شارب من ميه البحر
كانت الفرجة علي الاسماعيلي مرض و زهق و قرف و بكاء و أنين  مع السحنة المضلمة و حتي لو كان خلف قاعد في المدرجات
 كان لو الاسماعيلي جاب جول .. كنت تحس انه حيتعادل و يتغلب كمان ..ده كان شئ اكيد
راحوا الغربان ... و افرنقعوا
الاسماعيلي يجيب جول .. حلو .. بقي ممكن يجيب التاني .... وحتي لو تأخر ... ممكن يرجع ويتعادل ويفوز ويعمل أحلي ريمونتادا او ليمونادة بالنعناع .. معلش احنا في شهر الصوم ودرجة الحرارة كانت النهاردة 42 وكل عام والجميع بخير و سعادة
و اوعي تنسي .. اوعاك تنسي
 ان هناك الهر الساحر علي ابو جريشة موجود في النادي و الهر الساحر ده يا رجالة
اروع و احسن و اجمل من لمس كرة القدم في مصر علي الاطلاق
و كل من لعبوا  كرة القدم .. جنب الهر الساحر ... يعتبروا لمبة 5 شمعة او صاروخ فلاحي
 لكن الهر الساحر = 10000000 شمعة منورة داخل الاسماعيلي و مصر كلها
100000000 شمعة هالوجين كمان مش صوديوم
 يعني أي لاعب في الفريق حاليا .. لازم يبربرش  و هو واقف قدام الهر الساحر فاكهة الكرة المصرية صاحب الراس الذهبية
فاكرين يا جماعة الخير  لما كانوا بيجيبوا خلف .. قاعد في المقصورة منور و ملعلع
 نهار اسود ... دي كانت ايام سودة و اسود من الزيتونا .. و جننونا 

 المهم
 الف الف مبروك  الفوز علي الجونة 3-2  و فرص ضائعة بالكوم
و رجولة في الاداء  و عرق و جهد و طموح و رغبة في الفوز و النقاط
لاعب اسمه محمد حسن .. ممتاز و رجولة و اخلاص و مسمار حدادي في وسط الملعب
و الا نادر رمضان
 يا عيني علي نادر رمضان
 سيبك من ضربة الجزاء اللي تسبب فيها
 اية الروعة دي يا نادر
فاكرين – خلف الحبايب – ده عمل ايه في نادر رمضان
فاكرين و الا ناسيين
 اوعوا تكونوا ناسيين
 هو ده الفارق بين ..نادر رمضان  مع خلف
و بين
 نادر رمضان مع الهر و العمدة و ايهاب جلال
هو ده الفارق يا رجالة
 العدل و الحق و الجهد و الاخلاص
و بين
الطمع و العبط و التناكة و الناظر و تابعه قفة
السحتين دول لم يتلفوا اللاعبين فقط
 دول اتلفوا كل الكادر التدريبي لاولاد الاسماعيلي
ولعوا في ابو طالب العيسوي و العجوز و محمد محسن ابو جريشة و محمد وهبه و كل المدربين الاجانب
يا سادة
 دول اتلفوا تاريخ الدولي  سعفان الصغير  صاحب  ثلث تاريخ حراسة المرمي في الاسماعيلي
و جعلوا من الدولي سعفان .. عدو الجماهير .. بعد ما كان معشوقها الاول
 يا سادة
 دول اتلفوا ...  الجماهير نفسهم
تصدقوا ان فيه واحد اسماعلاوي محترم  كاتب النهاردة ان اخر ماتش شافه للاسماعيلي هو ماتش الانتاج الحربي 3-3
يعني بطلوا جماهير الاسماعيلي اللي كانوا المحرك الاول .... ضربوا الجماهير نفسها يا سيد

شوفوا الفوز خلي عماد النمر يقول ايه :

رمضان فى مصر حاجه تانيه والسر في الدراويش فوزو بيحلى الدنيا ومكسرات وياميش 
الف الف مبروك للفوز
و عقبال الباقي
و يرجع الدراويش ..راجع تاني
و السلك حيغني اغاني
و مليار مبروك
و انتهي الكلام خارج المقرر
و رمضان كريم و الله أكرم