رمضان كريم معانا والمحمدي ... صاحي و بيلعب

ألف ألف مبروك الفوز و حصد 3 نقاط و الفوز الرابع علي التوالي

علي البنك الاهلي و الا البنك الزراعي و الا حتي بنك الحظ .. هما ثلاث نقاط , معرفناش ناخدها في رصيدنا  بالأول من الموسم الحالي ... لما في النادي بوم نحس  و غرابين ريشهم اسود من  نيتهم الهباب 

و بسم الله ما شاء الله ... و رمضان كريم قوي مع الدراويش  و الله أكرم ان جعلنا نحافظ علي صيامنا  السنة دي ... بعد 3 رمضان سابقين...  مع اللي بالي بالكم ... و الله غفور رحيم و يسامحنا و يجعلهم بعيد عننا
 شوط أول رخم و بارد و استحواذ  من الاسماعيلي و البنك الاهلي موظف كل الكاونتر  في الدفاع و حتي الفرونت ديسك واقف ورا .. و سايبين قدام الاخ  احمد علي كلاي
و الاسماعيلي – واسيك مالفوز – و لعب علي قد الوقت و خلاص – صحيح أخونا محمد صادق عانده الحظ في د 5 في القائم و فخر الدين ... رجع تونس الخضراء  في الشوط الاول و ضاعت منه كورة و هو في قلب الجول د 27 و لكن الاسماعيلي لم يستطع – سحب – المدافعين الي الاي تي ام .. و الدليل علي ذلك اول كورنر بالدقيقة 25  للدراويشو كورنر تاني في نفس الدقيقة  
بالشوط الثاني كان لابد من هدف لفك الوديعة و إلغاء الحجز و مفيش غير الصحراوي يطلع للأمام و رأسية روعة بجانب القائم د 48 و انذار مش مفهوم لعماد حمدي و الحكم لا يحسب شئ  الشك عنده ممنوع و كل قراراته من دماغه
و الخطورة تظهر بانقاذ محمد فوزي – علي الواقف -  لصاروخ فادي نجاح  و ظهر أن المباراة بدأت تهرب من الاسماعيلي
و الكل خايف من الثقة بالشوط الأول و أصبح خايف من البنك يحجز علينا بهدف مباغت
 و لكن فخر الدين يلعب رأسية و يقلد الهر الساحر علي ابو جريشة بوضع الكرة في البعيدة من فوق الحارس احمد السعدني  د 58
و تختلف المباراة و اصبح البنك الاهلي بيلعب  و يهاجم و و محمد فوزي يتألق في مرتين اروع تألق د 62 و 59
و هل هو ده فوزي المصنوع و اللي كان تجميع من الوكالة بواسطة الدولي
و الله عجايب !!!!!
و الحكم الحنفي يراجع الفار و لا يحسب ضربة جزاء 68
و يظهر محمد صادق مش صادق و يخرج و ينزل مكانه اري بابل د 75
و تسر المباراة علي وتيرة واحدة تمكن من محمد حسن و عماد حمي و عبد الله جمعة أحسن لاعب في المباراة -و هاوي التشميس – و رايق و جميل جمال مالوش مثال

و مروان الصحراوي بيصرخ و يقول : زود زود زود ....ده احنا كان معانا في النادي صندل  

 و يطرد الحكم محمد الحنفي اللاعب احمد ياسين احد موظفي الائتمان و الضرب في البنط – 88
و يقدم عماد حمدي هوايته في الاسيست لاري بابل و يحبس المباراة بخمسينة في اللذيذ و يسجل هدف الاسماعيلي الثاني د89
و 8 دقائق وقت بدل الضائع و لاول مرة لا تخاف جماهير الدرراويش من الوقت بدل الضائع

و فجأة

ينزل باهر المحمدي  بدل محمد عادل الجهد
و هنا دقي يا مزيكا - فرايحي .. باهر المحمدي رجع للملعب و صاحي يا سمك القنال  
 مزيكا فرايحي للاسماعلاوية الحلوين  اللي بيشجعوا فريقهم و مش عاملين في أهلها صحافيين 
و دقي يا مزيكا – حزايني – للهبيدة اللي خلوا باهر المحمدي يوقع 333 مرة للنادي الاهلي
و بصراحة الهبد و الفرقعة و الكلام الفارغ بقي كتير قوي
و خفاف الدم اللي قالوا.. الشهيد و مضروب  رصاصة و من ضحايا كمين البرث
ازيكم دلوقتي – اهمدوا بقي  - حجتكم في الهبد  خلصت
 علشان كان بيحكم النادي – عطاشجي و معاه طرشجي و فرارجي و بولي  كمان
أي لاعب يظهر – بيع أمه – و هات فلوس
يبيع ياخد فلوس – يجيب مكانه لاعب -  ياخد فلوس
 منشار – طالع واكل نازل واكل
لكن حاليا فيه الهر و العمده.... عارف يعني ايه الهر و العمدة 
و الهر عارف كويس العلة و المرض و الانكلستوما و البلهارسيا و الدودة الشريطية  اللي كانوا مستوطنين  في بطن و قولون  النادي ..كان سببه بيع اللاعبين
و اتذكر   كلمات للهر الساحر علي ابو جريشة :
 مفروض المسئولين علي الفريق كانوا يعالجوا الخلل الدفاعي في الموسم الماضي ... لكن و إنا باتفرج  علي ماتش للبنك الاهلي في أول الموسم .. لقيت أسامة إبراهيم إتباع  بيلعب في البنك الاهلي... هما ايه .... بيبيعوا و الا بيدعموا الدفاع .. هما بيعملوا ايه في الدفاع و الفريق كله ... شئ غريب جدا جدا
 يعني الهر الساحر عارف المشكلة ايه و سببها ايه
 تعرفوا تتبطوا شوية
و الا حتواصلوا الهبد علشان عبد الرحمن مجدي لسه شهيد  
و الا ايه
قولوا ما تريدوا .. ربنا ما يحرمكم من الهبد و اللت و العجن
و الف الف مبروك لأحباب الدراويش
و رمضان كريم و الدراويش في الاسماعيلية و القدس عربية 

 
و انتهي الكلام خارج المقرر