اخرة الدلع ,عرفتوا الكورة مكسب و الا ايه

من اسوآ ما حدث في ايامنا الحالية .. هي صحافة المواطن .. او

ما يسميه البعض التواصل الاجتماعي 

اي واحد يمكن يكتب اي حاجة في اي حاجة 

مجرد ان يخطر علي بال الفرد اي خاطر .. يجري يكتبه .. بدون تفكير او تعقل في معني و نتيجة ما يكتبه ..  .. المهم يكتب و خلاص .. حتي لو سارق الكلمتين و فاكر نفسه خفيف الدم و حلو

و بعدخمسة فوز للاسماعيلي .. كانت الحالة المزاجية لجماهير الدراويش عالية و لكن بعقل و ذكاء  .. و لكن  ذهب البعض الي المبالغة بالدخول في المربع الذهبي .. و كاس مصر كمان .. ليه لا ...  و عيدوا الدوري من تاني و هاتولثا لنا الاهلي .. و هانوا لنا بايرن ميونيخ ...  و اي كلام في الكنافة 

لعل اخرة الدلع في الكتابة ما كرره الكثيرين : هي الكورة .. مكسب .. و ايه !!!!

اتمني ان تكون عرفتوا يا حلويين : الكورة مكسب وايه ..   يا اعزائي النحانيح 

لكن للحقيقة .. احد العقلاء المحترمين .. جمع  كل شغل المبالغة و النحنحة في بوست واحد و اكثره طبعا هي : هي الكورة مكسب و ايه !!!!

و كتب كلمتين تحذير رائعةو عاقلة و فاهمة 

,طيب ما هو اثر ذلك علي الفريق و اداء اللاعبين امام فريق المقاولون ... اظن ان نتيجة المبالغة و الدلع و النحنحة .. ظهر في مستوي الفريق من اول دقيقة الي الدقيقة 100 من المباراة 

لا يوجد لاعب يستحق 1 من 10 طوال اللقاء 

 حتي الكابتن حمد ابراهيم المدرب المساعد = صفر من مئة 

الكابتن شايف الفريق مضغوط من الدقيقة الاولي و بيلعب في نصف ملعبه و تمريزات الدفاع  اخطر من الكوفيد 25 و اخونا محمد فوزي عامل نفسه امين دابو .. بيرقصو يتمرقص بمنتهي العبط 

 و حمد ابراهيم واقف زي اللطظانة .. و لا له لزمة

واول محاولة للهجوم و التسديد في د 28 .. بعدها حارس المقاولون سافر و محدش شاف شعره المنكوش .. و لا هجوم باي شكل من الاشكال 

و شكري نجيب ... نجيب منين له احساس منين و فخر الدين بن يوسف .. سقط في الجب و احمد متولي بقي احول مبلولي ... و الكل اقل من مستواه بمراحل ..عدا عماد حمدي و محمد حسن .. لان مهام الافساد و ليس البناءو حتي مروان الزرعاوي .. نفس غلطته المليون .. تسقط الكورة و بعبط  يرتكب فاول و مكرر بالكربونة 

و كارت احمر من الحكم البنا .. ليس بسبب الفاول و لكن بسبب غباء الصحراوي .. و ده كان  قبل نهاية الشوط الاول .. و اصل ما هي ناقصة اصلا  

 و ظهر ان المباراة هي مباراة الهدف الواحد 

 و كان لازم يظهر محمد هاشم و بركاته  و يسيب عمر سافيولا .. يحضر الفطار و يعمل سلطة و يتعشي و يشرب شاي .. و يرفع الكرة و لويس يلعب الكورة لوحده بالراس في شباك محمد فوزي بمنتهي العقل ( لويس مش فوزي ) ... هو هدف و بعدها يموت الكلام  و لو للدقيقة 100 بالوقت بدل الضائع 

و لو لعبنا 10000 دقيقة .. لن يسجل الاسماعيلي لان اللاعبين خارج التركيز و بيلعبوا بقيادة حمد ابراهيم اللي كاد يلطم بسبب الميس باص و الميس عقل 

عموما .. اتصور ان الهزيمة مفيدة.. ان كنا يمكن ان نستفيد منها .. بمعرفة احنا فين و احنا مين و مفروض نعمل ايه

القصة صعبة و الهزيمة رجعتنا لموقفنا اللي مفروض نتعامل بعقل و عقلانية .. بلاش دلع و نحنحة و اي كلام في اي كلام و مبالغات و تهجيص و خلاص 

و معلش .. انتهي الكلام خارج المقرر من العين السخنة و النت مش كويس

 و نقطة و من اول السطر .. و خيرها في غيرها .. باذن الله تعالي