إسماعيلي إس سي - i s m a i l y S C - إيهاب جلال ..سبب الهزيمة مش الغندور

إيهاب جلال ..سبب الهزيمة مش الغندور

حجم الخط Decrease font Enlarge font
image

إتعودنا نتكلم بصراحة في الكلام خارج المقرر ... و بلا دبلوماسية بلا

 وجع قلب .. لا حنقول ماتش و عدي و ماتش للنسيان  و لا كل الكلام الماسخ  ده .. احنا ما نعرفوش

لكن قبل كل ده عايزين واحد من الدراويش يمسك ساعة  استوب واتش او ينزل الابليكشن و يشتغل  .. و يحسب الوقت الضائع اللي قدره الحكم احمد الغندور  بخمسة دقائق .. و ان شاء الله لن يجده الحاسب الواتشي اقل من 10 دقائق .. و حتي في الخمس دقائق اتوقف اللعب مرتين.. و تحس كده ان العندور المتغندر ... عايز يخلص الماتش و يروح  هايبر ون .. يجيب طلبات البيت و تمن لانشون و تمن بسطرمة .. لانه كان شكله جعان و هفتان و غندور  خالص

و الا التاكلينج الرهيب و العبيط من لاعب الاتحاد علي احمد كاستيلو و منها تسبب الهدف التاني للاتحاد السكندري .. لو حكم ببزازة ..تتحسب فاول و طرد للاعب الاتحاد .. لكن الغندور المتغندر و المسيطر .. عداها بالعمي الحيثي و بدون فار و لا قطة ... و 2-1 للاتحاد يا غندور يا ابن الغندور   

بس اوعي نفهم من كلامي ان  الغندور هو سبب الهزيمة .. هو واحد  من اسبابها.. لكن السبب الاساسي و الاحتياطي ..هو الكابتن ايهاب جلال ..بدون لف او دوران شبرا و دوران المظلات 

الليلة كلها يشيلها . ايهاب جلال و من قبل المباراة بيومين  تلاتة اربعة كمان   

 ليه .. تعالوا نحسبها مع بعض 

 ليه بنقول 2 او 3 او 4 ايام .. لان النفخ في اللاعبين ..كان فوق الوصف من الجماهير و الاعلام و من بتوع الكاوتش كمان .. وصلوا اللاعبين انهم بيلعبوا في كوبا امريكا نفسها و اصبح كل لاعب فاكر نفسه مضبوط علي 45 بار و حيفرقع من الانتفاخ  .. و دي مهمة المدير الفني  الواعي الفاهم  الدوقرم .. انه يفسي اللاعبين من الانتفاخ و يرجعهم 28 بار و خاصة الدنيا حر ولعة و ممكن اللعيبة تفرقع  .. و ده اللي حصل اليوم كله فرقع و انفرنقع

  البوب مكشر و حزين حزن اليتيم طوال الماتش .. الي ما تعرفشي اتلعب منه كام دقيقة و اتاخر في التغير مع ان الحظ خدمه بخروخ خالد الغندور افضل لاعب في الاتحاد و اكثرهم تحركا .. لكن البوب سابها كده و كدة

كل اللاعبين من اول دقيقة الي الدقيقة 15 في الاسماعيلي لسه ما جوش  و لا لاعب لعب لعبة واحدة سليمة كله في نص ملعب الاسماعيلي  و انكماش بلا مبرر .. حتي اننا ما كناش نعرف اسم حارس مرمي الاتحاد السكندري اسمه ايه او شكله ايه او لابس فانلة لونها ايه 

و طوال ال 15 دقيقة - هجوم و فاولات من اماكن  خطرة علي الاسماعيلي و 3كورنر  و ماعندناش خط النص نهائي .. و اخيرا ظهر حارس الاتحاد و اسمه محمد صبحي ..لما صد كرة و تصويبة  فخر الدين بن يوسف د 16

لما الاسماعيلي امتلك الملعب طوال الشوط الاول بعد الدقيقة 16 .. ظهر ان العيب من  محمد صادق و عمر الوحش  بتواجدهم معا و الفارق كبير بين المهاجمين و خط الوسط و مفيش صانع العاب و حتي محاولات الوحش بتسقيط الكرة .. اتفهمت و لعبوا بتضييق المساحات .. و لعب الاسماعيلي بدون صانع العاب 70 دقيقة .. و لذلك لو حسبت عدد الفرص الضائعة لن تجدها اكثر من 3 طوال الماتش

 كلنا شوفنا  عرفنا ان الناميبي شيلونجو مش في يومه  خالص و لان شيلونجو  له 3 ايام  في السنة ( اون ) و 362 يوم ( اوف ) هو كاتالوجه  كده  و كلننا عارفيمن كده .. لكن ايهاب جلال  مش شايف كده لان الكتالوج  بتاع شيلونجو باللغة الناميبية و البوب ثقافته هندية.. حد شاف كرة شكري نجيب اللي لعبها لشيلونجو في الشوط الثاني و طلعها اوت عند خط التماس .. و الله كانت نكتة .. هو  شيلونجو عامل زي ثمرة السنكوتيا سوفاليكس كوتانمارا  .. بتزهر 3 ايام في السنة بس.. و علي فكرة مفيش زهرة بالاسم ده

 غياب عماد حمدي فزورة غريبة و انظروا الي تحركات الفريق السكندري مفيش قطع للكرة في منتصف الملعب الا باداء شنكحاوي  من صادق و الوحش مش عارف مكان له و بيلخبط اللي جانبه من محمد حسن  كل هجمات الاتحاد كانت من خط النص .. عماد حمدي كان افضل من كل الموجودين ديفندر او قاطع العاب

برضه ايهاب جلال شاف د 62 و 64  و عرضيات الاتحاد  الخطيرة  صورة مكررة و مسمرة المدافعين  بالارض و كانهم ملزوقين جلو بتاع صيد الفيران ... و مفيش تغيير و كان لازم الدقيقة 66 و عرضية كوبي  و كان المدافع  هو فخر الدين التونسي !!! .. و تشهد جول الاتحاد و عمار و الصحراوي ملزوقين في الارض بأمير الفا ...  و رجلين خالد قمر كمان  علي الارض .. و يسدد برأسه  هو مرتاح 48 قيراط  و بيقولوا له اتفضل يا قمر .. سجل ..  و فوزي معذور بصراحة لانه بيلعب من غير قلب دفاع  و من غير قلب مدير فني كمان..طيب تصدقوا ان الاتحاد السكندري جاب جولين من 3 محاولات فقط ما بين الثلاث خشبات ... طيب تقول ايه و تعيد ايه    

علي فكرة د 70 ..كان فيه تسديدة راسية خطرة نسخة طبق الارض من الهدف و  قلبي الدفاع  برضه لاصقين في الارض لصقة بغراء

 كل الجماهير كانت تنتظر تغيرات قوية و فعالة  مش بدخول  فلان او علان  لكن بتغير طرق الاداء من اول الثلث الهجومي ... لكن ظهر ان الاداء الهجومي لم يتغير بسبب ان فخر الدين بيلعب علي العالي و شكري عايز يدخل خط التمنتاشر من وسط 200 لاعب .. زي ماتشو مان .. و شكري  عايز يدخل المنتخب و يحترف بره علي السلم 

 طيب هو مش عبد الرحمن مجدي سليم ... طيب ليه ما يلعبشي  من اول الشوط الثاني ... ليه عم البوب.. مش ملاحظ ان فخر بيلعب جناح مكسور  و شيلونجو في الطراوة .. ما  تجرب طريقة هجومية اخري من بدري .. ليه يا عم البوب ... بوب بوب بوب 

طريقة تعامل المدير الفني  مع مجريات الماتش مش عايزة تكشيرة و لا تبويزه .. عايزه تعديل هجوم و خاصة ان الطريقة مش نافعة و في وجود  محمد صادق  و اللي متهيأللي لو اتفرج علي تسجيل للمباراة ... حيلطم علي وشه ,,, من الهباب اللي عمله من بداية الشوط التاني .. حاجة كده زي القطط مشمش لما بيلعب بكرة خيط .. تكعبله و يكعبلها و ايهاب جلال البوب مكشر و بيقول له كنت تلعبها كده يا صادق 

طبعا واحد من الجمهور حيقول لي يا كابتن لطيف ..ما يصحش كده بتقلل من قيمة البوب و تهبطه  .. حاقول لك لا .. مفيش حد من غير اخطاء و مفيش حد ما بيغلطشي  و البوب مدرب كبير و كفاية انه خرجنا او كاد .. من المصيبة اللي كنا رايحين ليها  مع الناظر و شركاه ... لكن قول الحق دي مسئولية و الكلمة مسئولية  و لو تعتبرها ضد مين و اتصور ان التشكيل من البداية معيوب و التغييرات معيوبة و متاخرة و تغيير خط الهجوم  مفقود ..  و افضل مدربي العالم فرقهم بتكسب و بتخسر ... مفيش مشكلة .. المهم نتعلم و نستفاد .. و عايزين ايه تاني 

اقول لكم .. التعادل اهانة للبوب ايهاب جلال و نص فريق الاتحاد السكندري غائب .. اومال الهزيمة ابقي ايه شرف و احسبوها الاتحاد اخر مرة اخدنا رايح جاي و الله عيب  

عموما هارد لك للدراويش و توقف طويل  للمنافسات .. و مطلوب حاجات كتييييير  خارج المستطيل الاخضر

 افكركم بيها

 انهاء موضوع ازمة غرامة نادي المستقبل - التجديد لايهاب جلال - ترتيب الصفقات الجديدة - منح الشارة الخضراء الكثرين من اللاعبين اسري الدكة و لان الدوري حيرجع يوم 2 اغسطس و مفيش وقت خالص وقتها حندخل في مطحنة سودة  .. لان 27 اغسطس باب القيد الجديد حيتفتح .... غير كده .. حيبقي الفريق و النادي في البالوظة

و انتهي  الكلام خارج المقرر

جديد إس سي
image

إذهب الي النسخة الجديدة من موقع اسماعيلي اس سي

يرجو موقع اسماعيلي اس سي من السادة متابعي المنتدي الذهاب الي النسخة الجديدة من موقع اسماعيلي اس سي
image

محمد حسن يغيب عن مباراة الزمالك

كتب مؤمن مجدي ...حصل لاعب وسط الاسماعيلي محمد حسن علي الانذار الثالث له اليوم اثناء مباراة الاسماعيلي و الاهلي
image

فوزي الأجمل و الأروع .. يحقق التعادل للمتراجعين

من المعلومات الاولي .. ان ممكن حارس المرمي يحقق التعادل او يحافظ علي التقدم و يصلح اخطاء التشكيل .. لكن مش مطلوب من حارس المرمي انه يطلع يهدف و يجيب جول .. ما أظنش و ما حصلتشي من أيام هيجيتا حارس كولومبيا
image

علشان قلب فوزي أبيض زي الياسمين ..و درجات اللاعبين

بقلم د.اكرام نسيم ... بتفوق غير محدود للحارس محمد فوزي يصلح كل غلطات و التفانين .. و تعالوا نشوف درجات اللاعبين
image

تعادل غير عادل للدراويش مع الاهلي بهدف لكل منهما

بقلم د.اكرام نسيم ... الحكم والڤار يقسوان علي الدراويش
image

تشكيل الاسماعيلي لمواجهة الاهلي

كتب مؤمن مجدي .. اعلن الكابتن ايهاب جلال عن تشكيل الفريق لمواجهة الاهلي و التشكيل مكون
image

الاسماعيلي في مهمة صعبة امام النادي الاهلي

مباراة الاسماعيلي و الأهلي مساء اليوم الأربعاء، ضمن فعاليات الأسبوع التاسع و العشرون من الدوري الممتاز. و يدخل الدراويش مباراة اليوم و هو يحتل المركز الحادي
image

فرمان من البوب بتجميد نادر رمضان بعد توقيعه للاتحاد

اصدر المدير الفنى للإسماعيلى إيهاب جلال فرمان يقضي بتجميد اللاعب نادر رمضان لاعب خط وسط الدراويش وخوضه تدريبات منفردة مع الثنائى محمد هاشم والأنجولى أرى بابل،
image

عماد سليمان: جددنا التعاقد مع فخر الدين بن يوسف لمدة شهر

نفى عماد سليمان، عضو اللجنة الفنية بالإسماعيلي، والمشرف العام على الفريق الأول، الاتفاق مع التونسي فخر الدين بن يوسف مهاجم الفريق، على خوض المباريات المتبقية
image

سليمان يوضح حقيقة التعاقد مع فخر الدين وموقف بابل

صرح عماد سليمان، عضو اللجنة الفنية بالإسماعيلي، والمشرف العام على الفريق الأول، الاتفاق مع التونسي فخر الدين بن يوسف مهاجم الفريق، على خوض المباريات المتبقية
Powered by Vivvo CMS v4.1.5.1