104 دقيقة مع السكر والضغط مع جلال

يبدو ان فانلة البحارة التي يرتديها الكابتن إيهاب جلال مع التكشيرة

طبعا حتقولوا لي انت تاني مرة – تشد علي  104 دقيقة ,,, قد أصابت جماهير الاسماعيلي بالسكر والضغط والإستبحس والسيمابول .. علي رأي الفنان يوسف وهبي 

 جلال.. المرة الاولي ماتش الاتحاد السكندري اللي خسرناه بسبب الافتكاسات الجلالية .. و قلنا ان :  إيهاب جلال ..سبب الهزيمة مش الغندور
وقلنا بلا دبلوماسية انحيازية مهلبية
ولو عايز تراجع ما قلناه .اتفضل عزيزي القارئ الرابط
هنا

والعملية ليست تقليل من الكابتن ايهاب جلال علي الاطلاق .. لكننا في موقع اسماعيلي اس سي لا نقول الا الحقيقة ولا ننقد علي طول ولا نصفق علي طول ... كله في وقته .. وعلي ما نراه نكتب بكل امانة وصدق

ارجع ببساطة الي القسم الخاص بذلك 

هنا

 لكن النهاردة ... تشكيل الكابتن ايهاب جلال .. غريب وعجيب وشاي الشيخ الشريب
ممكن نتفق او نختلف علي التشكيل
 ده عادي و شئ جميل و مطلوب 
  يب ..  الشوط الاول لا دفاع ولا هجوم وصناعة لعب ولا تنظيم خط الوسط وظلم للناشئ محمد عبد السميع في غير وقته ولا مكانه واستحواذ 51% والعودة للخلف ثم الخلف ثم الخلف
 يبقي كنا قاعدين في اسكندرية بنتدرب علي حكشة وبنبلبط وخلاص وساعتها بقي سامحني
ده مش شكل فريق لعب 4 او خمس مباريات ودية
 لكن ان يقف الكابتن بوباي .. قصدي الكابتن ايهاب جلال... وهو يتفرج – زينا
علي الشارع اللي كان مفتوح وسريع وبتجري فيه عربية اريك تراوري علي سرعة 200 كيلومتر في الثانية
  فعلا الباك شمال حسين السيد فتح شارع ولا شارع مصطفي النحاس بمدينة نصر بعد عمل الكباري الجديدة فيه 
مش كان يتحرك الكابتن ايهاب جلال ويقول لحسين السيد
 عيب يا حسين ... التزم يا حسين ..ما يصحش كده يا حسين
تراوري بهدل وبيهد جبهتك يا حسين
واتطردت بسببه يا حسين ولو انت حيبقي الصحراوي يا حسين
مش مصدقين
 تعالوا نشوف
الدقيقة 34 انفراد من شارع تراوري – ينقذها فوزي
انفراد من شارع تراوري – و د  60
دول الانفرادات و غيرها كتير من تحرك تراوري  مصطفي النحاس علي الفاضي و المليان

حتي الهدف الثاني لبيراميدز من السيمافور علي جبر .. واضح انها لعبة متمرنين عليها .. انا سبت علي جبر يتحرك بحرية والكرة في الهواء و سجل الهدف الثاني زي السكينة في الحلاوة ودفاعنا في الكنافة والبقلاة .. فين بقي التدريب علي الكرات الثابتة للخصم ..مفيش

نرجع للتشكيل تاني

الواضح ان الجهاز الفني لم يركز علي خطوط دفاع بيراميدز من قبل وضع التشكيل وراجعوا الهدفين للاسماعيلي .. خطأ من علي جبر استغله احمد مدبولي افضل استغلال .. حتي ضربة الجزاء بسبب الضغط الهجومي ..ده غير الهدف الملغي لمحمد الشامي د 85 .. غير كده مفيش و لا فرصة تهديف نهائي الا تسيدة من شكري نجيب د 71 - لكن تواجد صادق ومدبولي وعبد السميع والقاء الحمل كله علي محمد عادل وعلي دونجا اللي مش مفهوم بيلعب علي عماد حمدي ليه؟؟؟ .. وحتي في اللحظات الحرجة ,,  بعد هدف التعادل د 98 .. هناك فرصتين لفريق بيراميدز .. واحدة انقذها باهر المحمدي بفدائية د 101 .. والثانية انقذها الفار بالغاء هدف جون انطواي

 نيجي لاخونا الحكم نهاد جريشة - جريشة في عينه - اللي واقف علي بعد 3 متر من عمر جابر والكرة في ايده .. ولم يحسب ضربة الجزاء

وال ايه رايح يشوفها في الفار ..كمان

وكمان ركبة شريف اكرامي في الضلع العايم لباهر المحمدي .. ضربة جزاء زي بتاعة مروان كنفاني حارس الاهلي في السبغينات  

 خسارة اسم جريشة فيك .. وسبحان الله العظيم

مش غريبة اللي خلي المدونديالي جريشة يطرد الصحراوي وبعدين يطرد حسين السيد في لعبة لا تستحق الا انذار بالعافية- ما هو لا هوه أحول والا الفار أحول .. والا احنا اللي ما بنعرفشي نركب  

 هو ايه فيه ايه

 لكن يحسب للاعبين اللعب لاخر دقيقة وروح عالية من اجل تحسين النتيجة ولو حتي كنا بنلعب بعشرة لاعبين لكن كرة ضربة الجزاء من شكري نجيب في العارضة في العارضة قبل ما تدخل ..كانت صعبة وصعبة جدا   

كلمة اخيرة ... هما ليه بعض الاسماعلاوية ما بيتعملوش ابدا

 فعلا بعض جماهير الاسماعيلي زي البط الخضير ... الشكاري يصفر .. البط يزعق .. يصطادوه 

عجايب !!!!! والله عجايب  

 شايفين فريق بيراميدز نصه من الاسماعيلي - علي جبر وجون انطواي واحمد فتحي وابراهيم حسن وعبد الله السعيد 

وواحد جاي في نص الماتش ..يقول : هو مش الاهلي مش عايز باهر المحمدي .. ما ياخده 

 طيب ايه رائيك يا عم الأمور .. ان باهر المحمدي شال هدف اكيد بالدقيقة 101 ..وكانت حتضيع منك كمان النقطة

والا اخونا - ليل نهار - اللي بيحلم بـ 30 مليون جنيه من بيرلميدز وعايز يشتري بيهم احمد الشيخ ومحمود ياسين ورفعت الفناجيلي كمان

 الهر الساحر علي ابو جريشة صحيح قال : الاسماعيلي أمن قومي .. وعجبتنا كلنا 

 لكن الهر قال ايضا : اتقوا الله في الاسماعيلي .. فعلا اتقوا الله في الاسماعيلي

وبطلوا ... هري    

 وانتهي الكلام خارج المقرر