الاسماعيلي الغني ( يبقشش ) للقنوات الغلبانة

غريب جدا أمر مسئولي النادي الاسماعيلي .. بسماحهم للقنوات الفضائية الخاصة بدخول كاميراتهم لتسجيل لقاء النادي و فريق تريبل بطل مدغشقر

..مجانا من باب ( البقششة و العنظزة ) 

 و لان الاسماعيلي قد امتلئت خزانته و مخازنة  بالاموال و الذهب و المرجان و الياقوت ( أحمدك يا رب ) ..فكان لابد ان (يصعب) علينا حال القنوات

الفضائية الغلبانة و الفقيرة  بالدخول و التسجيل  مجانا و اعفائهم من دفع رسوم 10000 جنية لتسجيل المباراة  5000 جنيه لتسجيل الكواليس .. فتم- فجأة و علي حين غرة ( مع ان مش فاهم يعني ايه دي ) .. تقرر  اعفاء تلك القنوات الخاصة الغلبانة من دفع المبالغ ( الظالمة) و مع ان القنوات بدأت علي الفور في تسويق تسجيل المباراة و اتفقوا مع شركات  اتصالات و فودافون و كوكا كولا  و كمان مجمدات  الحسن و الحسين و ميت لاندو.. لتحقيق مكاسب عن المباراة الواحدة بمتوسط 150000 جنيه .. و لكنهم قنوات خاصة و باحد تلك القنوات مراسل خاص جدا و خيره الفضائي علي الجميع بالظهور في فضائية شهيرة و مع  مقدم برامج شهير  .. ومساء الانوار .. و الخير يعم الجميع من مودرن الي غيرها .. دون سداد قرش واحد للاسماعيلي الغني  و اللي ( مش عارف يودي الفلوس فين ) و المهم البقششة و العنظزة  

و مع ان القناة ستذاع علي اكثر من 11 شاشة فضائية و ارضية  ومنها القناة الثانية الموجهة الي امريكا علي القمر الصناعي الهوت بيرد .. لا مؤاخذة ..  لكن كل هذا لا يكفي سعادة المسئول  ..لابد من الكاميرا الخاصة المحبوبة  ان تعمل مع السيد المسئول ( المبقشش )  اللقاء المعتاد و هو يبتسم و يقول ( في الووووواكع ) و هو منتفخ اوداجه ( برضه ما نعرفش يعني ايه أوداجه ) .. و ايه لزمة الفضائيات الحكومية و الارضية .. لكن ان تقول ( في الووواكع ) علي قناة خاصة  .. لها ( واااكع ) تاني خالص

و الله مسكين يا  الاسماعيلي .. لا قانون و لا لجان تسويق و لا تنمية موارد و لا اي سياسة تسويقية واضحة 

كلها اجتهادات و عشوائيات  و هوده ( الوااااكع ) بتناعنا ... و للأسف 

نسينا نقول ان القنوات الناقلة هي  هى النيل للرياضة فضائى و ارضى و القناة الثانية فضائى و ارضى و الفضائية المصرية الاولى و الفضائية المصرية الثانية الموجهة لامريكا و استراليا و باقة المحروسة من الثرابعة الي الثامنة ارضي و فضائي